Details

Thu, 30 July 2015 9:00 pm

በተፈጥሮ ሳይንስ ኮሌጅ የሒሳብ መምህራንና የድህረ -ምረቃ ተማሪዎች ለሚያደርጉት ጥናትና ምርምር የተሻለ አቅም ለመፍጠርና የሒሳብ ትምህርት በሳይንሱ ዘርፍ ጉልህ ሚና እንዲኖረዉ ለማስቻል   <<The Role of Mathematics Now and in the Futuer>>በሚል ርዕስ ሐምሌ 11/2007 ዓ.ም ስልጠና ተሰጥቷል ፡፡
በዕለቱ በሳይንስ ትምህርት ላይ ያተኮሩ ሶስት የተለያዩ ጥናታዊ ጽሁፎች የቀረቡ ሲሆን ስልጠናው የ2ኛ ደረጃ ትምህርት ቤት ተማሪዎችን በሒሳብ ትምህርት ለጥሩ ውጤት ለማብቃት የሚያስችሉ የማስተማሪያ ዘዴዎች ፣ የፈተና ዝግጅት እና  የጥናታዊ ጽሁፍ ስነ-ዘዴዎች ላይ ያተኮረ ነበር  ፡፡ በቀጣይም የ2ኛ ደረጃ ትምህርት ቤቶች ከዩኒቨርሲቲዎች ጋር በመቀናጀትና በመደጋገፍ መስራት  እንዳለባቸው በስልጠናዉ ወቅት ተጠቁሟል ፡፡   
በአሁኑ ጊዜ በሒሳብ ትምህርት ዘርፍ የሚደረጉ ጥናትና ምርምሮች  አናሳ በመሆናቸዉና  በሌሎች የሳይንስ ትምህርቶች እየተዋጠ ስለሆነ የትምህርት ክፍሉ  ተጠናክሮ  የተለያዩ ፕሮጀክቶችን በመቅረፅና ጥናትና ምርምሮች በመስራት ችግሩን መቅረፍ  እንደሚገባው  የትምህርት ክፍሉ መ/ር ገብረፃድቅ ግደይ ገልፀዋል ፡፡
በፕሮግራሙ USA ከሚገኘው ሮዋን ዩኒቨርሲቲና  ከአምቦ ዩኒቨርሲቲ የመጡ  የተለያዩ የጥናትና ምርምር አቅራቢዎች፣ የተፈጥሮ ሳይንስ ኮሌጅ የሒሳብ ትምህርት ክፍል  መምህራን እንዲሁም  ከትምህርት ሚኒስቴር ተመድበዉ የመጡ 110  የድህረ-ምረቃ የክረምት ተማሪዎች ተገኝተዋል፡፡

Details

Thu, 23 July 2015 11:19 am

በዩኒቨርሲቲው ቴክኖሎጂ ኢንስቲትዩት የምርምር ዳይሬክቶሬትና በውሃ ሀብት ምርምር ማዕከል ዳይሬክቶሬት ትብብር 15ኛው ዘላቂ የውሃ ሀብት አስተዳደርና አጠቃቀም ሲምፖዚዬም ከሰኔ 26 እስከ 27/2007 ዓ/ም ተካሂዷል፡፡

ሲምፖዚዬሙ በዘላቂ የውሃ ሃብት አስተዳደርና አጠቃቀም ዙሪያ ባለሙያዎች፣ ተመራማሪዎች እና ባለድርሻ አካላት የጋራ መድረክ በመፍጠር የምርምር ውጤቶችን እንዲያቀርቡና የተገኙ መልካም ተሞክሮዎችን እንዲለዋወጡ ለማድረግ ያለመ መሆኑን በዩኒቨርሲቲው የቴክኖሎጂ ኢንሲትቲዩት የውሃ ምርምር ማዕከል ዳይሬክተር ዶ/ር መኮንን አያና ተናግረዋል፡፡ ለአገር ልማት አስተዋጽኦ ሊያደርጉ የሚችሉ በርካታ የጥናትና ምርምር ውጤቶች የሚቀርቡበት መድረክ በመሆኑ በውሃ ሃብት ዙሪያ ለፖሊሲ አውጭዎች ግብዓት ሊሆን የሚችል መሆኑንም አስገንዝበዋል፡፡

የዩኒቨርሲቲው ፕሬዝደንት ዶ/ር ፈለቀ ወልደየስ በመክፈቻ ንግግራቸው ኢትዮጵያ በውሃ ሀብት ያላትን ከፍተኛ አቅም በአግባቡ ለመጠቀም እንዳትችል በመስኩ የሚታየው የባለሙያና የፋይናንስ አቅም ውስንነት ድርሻው የጎላ ነው ብለዋል፡፡የውሃ ሀብት አስተዳደርና አጠቃቀም በሳይንሳዊ የጥናትና ምርምር ሥራዎች መደገፍ እንደሚገባው የገለፁት ፕሬዝዳንቱ ዩኒቨርሲቲው በግንባር ቀደምነት ባለሙያዎችን በማሰልጠን በዘርፉ የሚታየውን ውስንነት ለመቅረፍ የራሱን አስተዋጽኦ አጠናክሮ እንደሚቀጥል ተናግረዋል፡፡

በኢፌዴሪ የውሃ፣ መስኖ እና ኢነርጂ ሚኒስቴር የምርምር ዳይሬክተር አቶ አቢቲ ጌታነህ በመስኖ ልማት ፕሮጀክት፣በሰው ኃይል ስልጠና፣ በምርምር እና በሌሎችም ተያያዥ ዘርፎች በሚኒስቴር መ/ቤቱ በኩል የታቀዱ ሥራዎችንና የዩኒቨርሲቲዎችን ሚና አስመልክተው ለተሳታፊዎች ማብራሪያ ሰጥተዋል፡፡ በመጀመሪያው የእድገትና ትራንስፎርሜሽን እቅድ ዘመን በመስኖ ልማት ሀገራችን ካላት አቅም ከ40-50 በመቶ መጠቀም የተቻለ ሲሆን በኤሌክትሪክ ኃይል ከውሃ ፣ ከነፋስና ከጂኦተርማል ኃይል እንዳላት ከሚገመተው 45 ሺ ሜጋ ዋት የማመንጨት አቅም 10ሺ የሚሆነውን ለማሳካት ጥረት እየተደረገ መሆኑን ዳይሬክተሩ ገልፀዋል፡፡ በሁለተኛው የእድገትና ትራንስፎርሜሽን እቅድ ዘመን በዘርፉ ባለሙያዎችን በብዛትና በጥራት በማፍራትና በጥናትና ምርምር የተሻለ ሥራ እንደሚሠሩ ጠቁመዋል፡፡

በሲምፖዚዬሙ ከተለያዩ ተቋማት በመጡ ባለሙያዎችና ተመራማሪዎች 62 የጥናትና ምርምር ጽሑፎች ተመርጠው 28ቱ በመድረክና 11 ጥናቶች በፖስተር ቀርበዋል፡፡ በተጨማሪም ኔዘርላንድ ከሚገኘው ዋግናይን ዩኒቨርሲቲ የመጡትና በውሃ ሃብት ዘርፍ የረጅም ጊዜ ልምድ ያላቸው ፕሮፌሰር ሄንክ ሪትማን ‹‹በፍሳሽ አወጋገድ ዙሪያ የተዘነጉ እውነታዎች ›› በሚል ርዕስ ያቀረቡት ጥናታዊ ጽሑፍ የፍሳሽ አወጋገድ ምንነት፣ ዓላማና ሌሎች ተያያዥ ጉዳዮችን ዳሷል፡፡

በሲምፖዚዬሙ የዩኒቨርሲቲው የቴክኖሎጂ ኢንስቲትዩት መምህራንና ኃላፊዎች፣ ዳይሬክተሮች፣ ከውሃ ሀብት ሚኒስቴር፣ ከተለያዩ የመንግስት ዩኒቨርሲቲዎችና አጋር ተቋማት በአጠቃላይ 120 ተሳታፊዎች ተገኝተዋል፡፡ በማጠቃለያው የጥናትና ምርምር ጽሑፍ ላቀረቡ ባለሙያዎችና ለሲምፖዚዬሙ ስኬት ጉልህ ድርሻ ለነበራቸው አካላት በዩኒቨርሲቲው የምርምርና ማህበረሰብ አገ/ም/ፕሬዝዳንት አማካኝነት የምስጋና የምስክር ወረቀት ተሰጥቷቸዋል፡፡

Details

Thu, 23 July 2015 11:18 am

የዩኒቨርሲቲው የቴክኖሎጂ ሽግግር ማስተባበሪያና ኮሜርሻላይዜሽን ጽ/ቤት ከኢትዮጵያ ሳይንስና ቴክኖሎጂ ሚኒስቴር ጋር በመተባበር በቴክኖሎጂ ፈጠራ፣ ማላመድና ሽግግር ዙሪያ ከግንቦት 27-28/07 ዓ/ም የሁለት ቀናት ስልጠና ሰጥቷል፡፡

ሥልጠናው ለዩኒቨርሲቲውና ለአካባቢው ማህበረሰብ በቴክኖሎጂ ፈጠራ፣ ማላመድና ሽግግር እንዲሁም በአእምሯዊ ንብረት አጠባበቅ ዙሪያ ግንዛቤ ለማስጨበጥ የተዘጋጀ መሆኑን የማስተባበሪያ ጽ/ቤቱ ኃላፊ አቶ አሰፋ ደሴ ተናግረዋል፡፡

የኢትዮጵያ አእምሯዊ ሀብት ጽ/ቤት ባለሙያ አቶ ፈቃዱ ኃይሌ በስልጠናው ላይ እንደተናገሩት ሚኒስቴር መ/ቤቱ በህብረተሰቡ ዘንድ የአእምሯዊ ንብረት እውቀት እንዲዳብርና በቂ የህግ ጥበቃ እንዲያገኝ በመሥራት ላይ ነው፡፡

አዳዲስ ነገሮችን የመፍጠር፣ የማላመድና የማሸጋገር ሥራዎችን በማጠናከር ለማህበረሰቡ ችግር አማራጭ መፍትሄ ለመስጠት በሚቻልበት ሂደትና የፈጠራው ባለቤቶች ከውጤቱ መጠቀም እንዲችሉ እየሰራ መሆኑን በሳይንስና ቴክኖሎጂ ሚኒስተር የቴክኖሎጂ ሽግግርና ልማት ዳይሬክቶሬት ባለሙያ አቶ ተረፈ ቤኛ ገልፀዋል፡፡ ይህም በሚኒስቴር መ/ቤቱ ሀገራዊ አቅጣጫዎችን በተከተለ መንገድ ልማቱን የሚያፋጥኑ የቴክኖሎጂ ፈጠራዎች ወደ ተግባር እንዲለወጡ የማድረግ ሥራዎች በማከናወን ላይ እንደሚገኙም ነው አቶ ተረፈ የተናገሩት፡፡

በዩኒቨርሲቲው የምርምርና የማህበረሰብ አገልግሎት ም/ፕሬዝዳንት ዶ/ር ጉቼ ጉሌ በስልጠናው መክፈቻ ባደረጉት ንግግር ዩኒቨርሲቲው በምርምርና ማህበረሰብ አገልግሎት ዘርፍ ማህበረሰቡን ተጠቃሚ ሊያደርጉ የሚችሉ በርካታ ሥራዎችን በቴክኖሎጂ ፈጠራ፣ማላመድና ሽግግር ላይ በማከናወን ላይ እንደሚገኝ ገልፀዋል፡፡ከዚህም ጎን ለጎን በጥቃቅንና አነስተኛ ዘርፎች ላይ የተደራጁና መሰል ሥራዎችን በማከናወን ላይ ያሉ የማህበረሰብ ክፍሎችን አቅም ከማጎልበት አንጻር የተሻለ ግንዛቤ ለመፍጠር ግብዓት የሚሆን ስልጠና ለማዘጋጀት ጥረት እየተደረገ መሆኑን ዶ/ር ጉቼ ተናግረዋል ፡፡

በዩኒቨርሲቲው የማህ/አገ/ዳ/ጽ/ቤት ሥር የሚገኘው ቴክኖሎጂ ሽግግርና ኮሜርሻላይዜሽን ማስተባበሪያ ጽ/ቤት በዩኒቨርሲቲው ማህበረሰብ ከሚሰሩ አዳዲስ የምርምር ሥራዎች ውስጥ ለማህበረሰቡ የሚጠቅሙትን በመምረጥ፣ በመገምገምና ወደ ተግባር እንዲለወጡ በማበረታታት ተቀባይነት ያገኙትን በኢትዮጵያ አእምሯዊ ሀብት ጽ/ቤት ዕውቅና እንዲሰጣቸው ያመቻቻል፡፡

በሥልጠናው በአርባ ምንጭ ከተማ ከተደራጁ ጥቃቅንና አነስተኛ ማኅበራት፣ የፈጠራ ሥራ ባለቤቶችና በዩኒቨርሲቲው ከተለያዩ የትምህርት ክፍሎች የተወጣጡ መምህራንና ተመራማሪዎች የተሳተፉ ሲሆን በቀጣይ ከሚመለከታቸው አካላት ጋር አዳዲስ ቴክኖሎጂዎችን የማላመድና የማሸጋገር ሥራዎችን በትብብር እንደሚሰራ የማህበረሰብ አገልግሎት ዳይሬክቶሬት ዳይሬክተር ዶ/ር አለማዬሁ ታዬ ገልፀዋል፡፡

Details

Thu, 23 July 2015 11:16 am

በኢትዮጵያ የሲቪል ምህንድስና ተማሪዎች ማህበር ድጋፍ በዩኒቨርሲቲው ለመጀመሪያ ጊዜ በወቅታዊ የሲቪል ምህንድስና ሥራ ልምዶች ላይ ያተኮረ ሲምፖዚዬም ግንቦት 4/2006 ዓ/ም ተካሂዷል፡፡ በሲምፖዚዬሙ ከሲቪል ምህንድስና ጋር የተያያዙ ሙያዊ ጉዳዮችን በሚመለከት በሲቪል ምህንድስና ትምህርት ክፍል መምህራንና ተማሪዎች የተለያዩ ጥናታዊ ጽሑፎች ቀርበዋል፡፡

በዩኒቨርሲቲው የቴክኖሎጂ ኢንስቲትዩት ሳይንቲፊክ ዳይሬክተርና የእለቱ የክብር እንግዳ ዶ/ር ነጋሽ ዋጌሾ እንደገለጹት በአገራችን በምህንድስናው መስክ በአለም አቀፍ ደረጃ ያሉ ተጽዕኖዎች መጎልበት በመቻላቸው የኮንስትራክሽን ኢንደስትሪው ከማደጉም አልፎ ለምዕተ ዓመቱ የልማት ግቦች ስኬት የበኩሉን በመወጣት ላይ ነው፡፡ ኢንደስትሪው በግልም ሆነ በመንግሰት የሚጠይቀው የሰው ኃይል በእጅጉ በመጨመሩ በዘርፉ በእውቀትና በክህሎት የዳበሩ ባለሙያዎችን ማፍራት ወሳኝ ነው ያሉት ዳይሬክተሩ ይህን መሰል ፎረሞች መዘጋጀታቸው ሙያዊ አቅምን ለማሳደግና እርስ በእርስ ለመማማር እንደሚያግዝ ተናግረዋል፡፡

የአገሪቱ የልማት ህዳሴ በቴክኖሎጂ እንዲታገዝ በማድረጉ ረገድ በሲቪል ምህንድስና የሙያ መስክ የሚሰለጥኑ ተማሪዎች ሚና የጎላ በመሆኑ ማህበሩ ይህን ለመደገፍና አቅማቸው እንዲጎለብት ለማድረግ እንቅስቃሴዎችን እያደረገ እንደሚገኝ ተገልጿል፡፡

በሲምፖዚዬሙ የዩኒቨርሲቲው አመራሮች፣ በቴክኖሎጂ ኢንሲትቲዩት የሚገኙ የትምህርት ክፍል ኃላፊዎች፣ መምህራን እንዲሁም የሲቪል ምህንድስና የዘንድሮ ተመራቂ ተማሪዎችን ጨምሮ ከ150 በላይ ተሳታፊዎች ተገኝተዋል፡፡

የኢትዮጵያ የሲቪል ምህንድስና ተማሪዎች ማህበር በ2004 ዓ/ም ህጋዊ እውቅና አግኝቶ የተቋቋመ ሲሆን የዘርፉ ተማሪዎች ከሙያው የሚጠበቀውን ክህሎት እንዲያገኙ በማድረግ በታማኝነትና በጥሩ ስነ-ምግባር የታነፁ እንዲሁም የበቁ ምሁራንን በማፍራት ያደገች ኢትዮጵያን ለመፍጠር የሚያስችል ራዕይን አንግቦ የሚንቀሳቀስ ማህበር ነው፡፡